Локалитетот Градиште во с. Младо Нагоричане се наоѓа покрај левиот брег на Пчиња, јужно од с. Стрновац. Населбата е сместена на рид кој доминира со околината (сл. 1) и нуди добра видливост во сите правци, освен кон исток. Била користена уште од енеолитот, бронзеното време, железното време, па се до доаѓањето на Римјаните. Својот зенит го достигнала во 4-3 век пр.н.е., а потоа била запалена. Истражувањата кои ги организира НУ Музеј Куманово се започнати од 2014 г., првин во соработка со Институтот за археологија при Филозофскиот Факултет во Скопје (раководител проф.д-р. Марјан Јованов) и УЗКН, а од 2018 г. , Музеј Куманово самостојно ги води ископувањата (раководител Дејан Ѓорѓиевски).

Работено е на највисокиот дел на ридот (акропола) каде е откриен резиденцијален објект со отворен двор и простории околу него, кои имале боени ѕидови (сл. 2- 4). Најдена е и просторија за собирање вода, со малтерен под (можеби бања?, сл. 3), како и внатрешен трем со колонада од јонски столбови.

На средната тераса е откриен внатрешен бедем и стилобат покрај него (притоа добивајќи изглед на стоа, сл. 5), додека на долната тераса се откриени интервенции во карпа кои укажуваат на култови активности (сл. 6).

Проектот за 3д изложба на предметите од Младо Нагоричане претставува пионерски потфат на НУ Музеј Куманово за дигитализација на археолошкото културно наследство. Збирката ќе се надоградува континуирано, во зависност од бројот на предметите кои ќе се изложат на постојаната поставка на музејот.